புதன், 18 ஏப்ரல், 2012

உங்க ஷாருக்கான் என்ன அவ்ளோவ் பெரிய அப்பாடக்கரா ?

அவரவர்தம் விருப்பங்களும், தேர்ந்தெடுத்தலுமே
அவர்களின் சந்தோஷத்தை/துக்கத்தை 
நிர்ணயிக்கின்றன !

இது ஏதோ சாமியார் கூறிய நல்ல அறிவுரை போல, என்று நீங்கள்
பாராட்டினால் அவை அப்படியே என்னை வந்துச் சேரும் !  ஆம், இது
என்னால் எப்போதோ ட்வீ ட் செய்யப்பட்ட ஒரு கருத்துத்தான் என்றாலும்
இதை எப்போதோ, யாராவதோ கூட சொல்லியிருக்கக் கூடும் !
எதைக் கொண்டு வந்தோம் அதை நம்முடையது என்று சொல்வதற்கு ?

சரி, இப்போ எதுக்காக இவ்ளோவ் பில்டப் என்றால், நான் சரியான
ஒன்றைத்தான் தேர்ந்தெடுத்துள்ளேன் என்பதை உங்களிடம்
பகிர்வதற்க்காகத்தான் !

என்னுடைய மழலைப் பருவத்தில் என் வீட்டில் 'தினத்தந்தி' 
வாங்குவார்கள், கன்னித்தீவு தொடரை விரும்பி வாசிப்பார்கள் !
விவரம் தெரியும் வரை ரசித்தே வந்த நான், டீனேஜ் தொடங்கும் போதே
அந்த நாளிதழின் அதிகப்பிரசங்கித்தனங்களை வெறுக்க ஆரம்பித்தேன் !
ஒரு பாலியல் வன்முறையை அவர்களுடைய நிருபர் நேரில் சென்று
வீடியோ எடுத்ததைப் போல வர்ணித்து எழுதுவார்கள் !  இவர்களால்
ஒரு தலைமுறையே சீரழிந்தது என்றாலும் கூட அது மிகையில்லை !

பள்ளிப்படிப்பின்  இறுதிகட்டத்தின் போதே நாளிதழை மாற்ற விரும்பி,
'தினமணி' யைத் தேர்ந்தெடுத்தேன், இதற்குத்தான் இத்தனை குதியாட்டம் !
இவர்களும் சொற்ப சமயங்களில் சொதப்பத்தான் செய்தார்கள். 
அதாவது ஒருமுறை ராஜீவ் கொலையாளிகள் சிவராசன், சுபா,
ஜெயலலிதாவுடன் புகைப்படம் எடுத்துக் கொண்டார்கள் என்று
தவறான ஒரு புகைப்படத்தைப் பிரசுரித்து அசிங்கப்பட்டார்கள் !
சமீபத்தில் கோட்டூர்புர அண்ணா நூலகம் கட்டியதில் கருணாநிதி அரசு
ஊழல் செய்தது என்று கிளப்பி, தலைகுப்புற கவிழ்ந்து, அவர்கள்
மீசையில் மண் ஒட்டி........சரி விடுங்க, அரசியல்ல இதெல்லாம் 
சாதாரணமப்பா !  

மற்றபடி, அவர்களின் பல நடுநிலையான கட்டுரைகளும்,
பண்பு சார்ந்த அறநெறி நடைமுறைகளும், தலையங்கங்களும், 
காழ்ப்புணர்ச்சி காட்டாத செய்திகளும், என்னை
மிக மிக கவர்ந்தவை !  அதன்படிதான் நேற்று வெளியான அதன் 
தலையங்கமொன்றும்   என் மனதில் அடிக்கடி தோன்றி வந்த
ஓர் எண்ணத்தை பிரதிபலிப்பதாய் அமைந்தது !
அதைத்தான்   இங்கு சொல்ல ஆசைப்பட்டேன், இனி தொடர்வது
தினமணியில் வந்திருந்த தலையங்கத் துளிகள் !



// அமெரிக்காவில் நியூயார்க் விமான நிலையத்தில் நடிகர் ஷாருக்கான்  இடப்பெயர்வு சான்றளிப்புக்காக (விசா)இரண்டுமணி நேரம் நிறுத்தி வைக்கப் பட்டதற்கு, இந்தியத்
தொலைக்காட்சிகளும், வெளியுறவுத்துறை அமைச்சரும்
காட்டிய எதிர்ப்புகள் அசாதாரணமானது !  எஸ்.எம்.கிருஷ்ணா
ஒருபடி மேலே சென்று,  "அமெரிக்கா செய்வதை செய்துவிட்டு
மன்னிப்பு கேட்பதை தன்னுடைய வாடிக்கையாகவே
வைத்திருக்கிறது" என்று பொறிந்தார் !



'மை நேம் இஸ் கான்' என்ற ஷாருக் படத்தில், இரட்டைக் கோபுரத்
தாக்குதலுக்குப் பிறகு, அமெரிக்காவில், அமெரிக்க
முஸ்லிம் மக்கள், சந்தேகக் கண்ணோடே  பார்க்கப்படுவதாய் 
கதை நகரும் !  அதை  உறுதி 
செய்வது போலவே  இந்தச் சம்பவமும் நடைபெற்று விட்டது
வேதனைதான் !  ஆனால் இதன் மூலம் அமெரிக்கா நமக்கு
ஒரு முக்கியமான பாடத்தைச் சொல்லித் தருகிறது என்பதையும்
நாம் புரிந்து கொள்ள வேண்டும் !

இதே சம்பவம் ஓர்  அமெரிக்க நடிகருக்கு இந்தியாவில்
நேர்ந்திருக்குமெனில் அதை அமெரிக்கா எப்படி எடுத்துக்
கொண்டிருக்கும் ?  நடிகை ஏஞ்சலினா ஜூலி, மும்பை விமான
நிலையத்தில் தடுத்து நிறுத்தப்படுகிறார் என வைத்துக் கொள்வோம்,
உடனடியாக பாலிவுட், கோலிவுட் நடிகர்கள், திரைக் கலைஞரை
அவமானப்படுத்தி விட்டார்கள் எனக் குதித்திருப்பார்கள் !  உடனே
இந்திய அரசு என்ன செய்யும் ?  நம்முடைய அந்த இடப்பெயர்வு
அதிகாரிகளை தற்காலிகமாக நீக்கி, நம் நடிகர்களையும், அமெரிக்காவையும்
சமாதானம்  செய்திருக்கும்  !

அதுதான் அமெரிக்காவில் நடக்கவில்லை. அங்கும் அறிவுஜீவிகள் உண்டு.
எதிர்ப்பு  தெரிவிக்கும் கூட்டம் உண்டு, ஆனால் இதற்காக
அதிகாரிகளை தண்டிப்பது அங்கே காணப்படாதவை !  இன்னும்
சொல்லப் போனால், ஷாருக் அங்கு எதற்க்காக தடுத்து
நிறுத்தப்பட்டார்  என்பதைக் கூட, அமெரிக்க அரசு, அந்த
அதிகாரிகளிடம் கேட்கவே இல்லை, கேட்கவும் செய்யாது !
அந்த அளவு அரசியல் தலையீடு இல்லாமல் தம்முடைய
அதிகாரிகளை முழுச் சுதந்திரத்துடன் பணி செய்ய அமெரிக்கா
ஒத்துழைக்கிறது, எனவேதான் அந்தக் கோரமான இரட்டைக் கோபுரத்
தாக்குதலுக்குப் பிறகு அங்கு வேறெந்தப் பெரிய
அசம்பாவிதங்களும் நடை பெறவில்லை !  இதைத்தான்
இந்தியா கற்க வேண்டிய பாடமாகக் கொள்ள வேண்டும் !




நெடுஞ்சாலை சுங்கச்சாவடியில், உங்கள் காரில் ஆளும்கட்சி
கொடியிருந்து, நீங்கள் முக்கியப் புள்ளியாகவும் இருந்துவிட்டால்,
சுங்கக் கட்டணமின்றி கூட உங்களால் செல்ல முடியும் !
அரசியல்வாதிகளின் குடும்பத்தினரை யாரும் இந்தியாவில்
சோதனை செய்துவிட முடியாது.  ஆட்சியையும், பதவியும்
இருந்துவிட்டால், ஐ.ஏ.எஸ் மற்றும் ஐ.பி.எஸ் அதிகாரிகள்
கூட ஏவலாளிகளாக மாற்றி விடமுடியும் இங்கு !  இதை
மக்களாட்சியின் மகத்துவம் என்று வேறு பெருமைப்
பட்டுக் கொள்வோம் !


அமெரிக்கா சொல்லித்தரும் பாடமென்ன ?
" நீங்கள் எங்களை மட்டுமல்ல, இந்தியாவில் நுழையும்
அயல்நாட்டவர் அனைவரையும் சோதனை செய்யுங்கள்.  
அது ஹிலாரி கிளிண்டனாகவும்
இருக்கட்டும், நீங்கள் உங்கள் அதிகாரிகளை
அவர்கள் கடமையை வழுவாமல் செய்ய விடுங்கள்"
குட்டு வைத்து சொல்லித் தருகிறார்கள், நமக்குத்தான்
மண்டையில் ஏறமாட்டேன் என்கிறது ! //

வாசித்தீர்களா, ஊடகங்களின் தலையாய கடமை என்பது
இந்தப் பண்புதான் !  நானும் இதையேத்தான் மனதில்
சிந்தித்து வந்தவன், நாம் விரும்பும் ஒன்றை நமக்கு
பிடித்தவர்கள் வழியாக வெளிப்படும்போது
நமக்கு சந்தோஷம் பொத்துக் கொண்டுதான் பொங்கும் !



                                         -நன்றி-

























   

























   

செவ்வாய், 17 ஏப்ரல், 2012

காஞ்சிபுரத்திலும் ரத்தக் காட்டேரி அட்டூழியம் !














'காஞ்சிபுரத்திலும்' என்ற போதே புரிந்திருக்கும், அப்போ, இந்தக் ரத்தக் காட்டேரி நிறைய அக்கம்பக்கத்துல விளையாண்டுருக்கும்னுட்டு !
ஆமாம், வேலூர், வாலாஜா,  ராணிப்பேட்டை,  ஆற்காடுன்னு ஊர் சுத்திட்டு, அண்ணாத்த இப்போ காஞ்சிக்கு விஜயம் செஞ்சுருக்காராம் !


இச்செய்தியை, இன்று நாளிதழில் படித்தவுடன், ஏதோ நூறாண்டுகளுக்கு முன்னர் நடந்த சம்பவங்களைக் கோர்த்து, 'பொக்கிஷம்னு' போடுறாய்ங்க போலன்னு நினைச்சா, ங்கொக்கமக்கா...... 'ஹாட் நியூஸாம்ல' இது !



சரி, அது என்ன என்ன சேட்டையெல்லாம் செஞ்சுருக்காம் தெரியுமா ?  இந்த ரத்தக் காட்டேரிக்கு ஒரு கொழந்த  பொறந்ததாமாம்,  எவனோ ஒரு போலி டாக்டர் 
அந்த பிஞ்சுக்  கொழந்தைக்கு விஷஊசி போட்டு கொன்னுட்டானாம்  !  அதனால பழி 
வாங்க அந்தக் காட்டேரி,   தாத்தா உருவத்துல வந்து ரத்தக் காவு கேக்குதாமாம் !  நள்ளிரவு பன்னிரெண்டு மணி ஆச்சுன்னா கெளம்பிடுமாம்
ரத்தம் ரத்தம்னுட்டு போயி ஒரு ஒரு கதவா
தட்டுமாம், வெளிய வந்தா ஓங்கி.......யெய்யா
போதும் கொல நடுங்குது !

இப்போ சமீபத்துல நிலநடுக்கம் வந்ததே.....அதுகூட இவுக சொல்லித்தான் வந்ததாமாம், இந்த வானிலை ஆராய்ச்சி கேனப்பயலுக, கடலுக்கடில கண்டத்தட்டு ஏதோ மோதிடுச்சுன்னு புருடா வுடுறாய்ங்க !

சரி, இந்த பயபுள்ளய பின்ன எப்படித்தான்  சமாளிக்குறதாம் ? அங்கதான் தமிழன் தன்னோட
மூளய யூஸ் செய்யுறான் பாருங்க, நீங்க
அப்படியே ஷாக் ஆயிடுவீங்க !  

வீட்டுத் தலவாசல் சுவருல  செவப்பு  பெயிண்டால ஒரு  திரிசூலத்த வரையுறான், சரி இது ஓல்ட்  டெக்னிக் ஆச்சே,  எல்லா பேய் படத்திலும் கிளைமாக்ஸ்ல   ஹீரோயின் இத வச்சித்தான தப்பிப்பான்னு  நீங்க கேக்குறது புரியுது, ஆனா
நம்மாளுக அதுக்கப்புறம் ஒன்னச் செய்யுறாக.
'இன்று போய் நாளை வா' ன்னு எழுதி அந்தக் காட்டேரி பயபுள்ளைக்கு மெசேஜ் சொல்றாங்க ! 

இதுமாதிரி ஒருத்தன் அவன் வீடுவாசல்ல
எழுதிக்கிட்டு இருக்கும்போது ஒரு லகுடபாண்டி அவன்கிட்ட போயி, 'ஏன்யா இப்படி சூதானமில்லாம இருக்க, பொறவு நாளைக்கு அது வந்துடிச்சின்னா ?' ன்னு
கேட்டுருக்கான்,  நம்ம ஆளுக சொல்லாடல் திறமயப் பாருங்க அதுக்கு அவன் சொன்னான்,
'அது படிச்சுட்டு, 'ஓஹோ...நாளைக்குன்னுதான
எழுதியிருக்காக'....ன்னுட்டு திரும்பி 
போயிடும்' !

அட வெண்ணகளா , இந்த  சூட்சுமம்  கூடப்புரியாத ஒரு  அப்பிராணி சீவனப்  பாத்து இப்படியா நடுங்கித் தொலைப்பது ? 
இந்தத்   தரித்திரமா  பூகம்பத்த  கொண்டுவரும் ?  

ஒருகாலத்தில் நம் சமுதாயம்,  புரளிகளை  அப்படியே நம்பும் ஏனென்றால்  நம்மிடையே  பரவலாக, அதாவது சீரான  படிப்பறிவெல்லாம் அப்போது 
இருந்திருக்காது.  இன்று எதில் வளர்ந்தோமோ
இல்லையோ, ஊடகத் துறையில் உலகிலுள்ள
எல்லா நாடுகளுக்கும் இணையாக, வலுவாக
இருக்கிறோம்.  செல்போன், கேமரா, டிவி
என்று கிராமந்தோறும் கூட தொய்வில்லை !

ஆனாலும், இது போன்ற காமெடிகளை
அப்படியே நம்பி பரிகாரமெல்லாம் செய்ய
கோயிலுக்குச் சென்று, அங்கு பணிபுரியும்
ஆசாமிகளிடம் ஆலோசனை கேட்டு, நடு
ரோட்டில் விளக்கேற்றுவது, எலுமிச்சையை
அறுத்து குங்குமத்தில் தோய்த்து,  வாசலில்  இடவலமாய் வாய் பிளந்து
வைப்பது, கத்தாழைத் தோட்டத்த வாசல்ல 
கட்டுறது, படிகாரக் கல்ல கறுப்புக் கயிறுல
தூக்கு போட்டு தொங்க விடுறது....என்று சிறு குழந்தைகளை இன்னமும் மிரள வைத்துக்
கொண்டிருக்கிறோம் !


கத்தாழை

இந்த ஒரு கூத்தக் கேளுங்க, என் பக்கத்து
வீட்டுக்காரன் ஒன்னாம் நம்பர் பயந்தாங்கொள்ளி,  'சூனியம் யாரும் வச்சாலும்
உன்ன அது அண்டாம இருக்கணும்னா உன் வீட்டு
வாசல்ல ஒரு படிகாரக்கல்ல தொங்கவிடுன்னு'  ஒரு கருமாந்திரம் புடிச்சவன் யோசன சொல்லிட்டு
போயிட்டான், இவன்தான் விருஷம் பழமாச்சே
ஒரு செங்கல் சைசுல படிகாரத்த வாங்கி
தொங்கவிட்டான்.  ஒருநாள் பாருங்க அவன் 
வீட்டுக்கு வந்த ஒரு  பெரிய இடத்து  சொந்தக்காரன் தலைல, கயிறு நெகிழ்ந்து
அந்தப் படிகாரக் கல்லு விழுந்தது !  ஆனா...
ஆன்ட்டி கிளைமாக்ஸ் என்னன்னா 'அவைன்
சைத்தான் கி பச்சாப்பா, அதான் அவன் தலைல
விழுந்து, அவன் வீட்டுக்குள்ள நுழையாம  உன்னக் காப்பாத்திடுச்சு' ன்னு  அவன் மாமியாக் கிழவி சொன்னா !   கொஞ்சம் யார் வீட்டுக்கு போனாலும்
வாசலப் பாத்தே போங்க, அடி வாங்குறது
மட்டுமில்லாம இது போல வசவெல்லாம் 
கிடைக்கும் ! 


அஞ்சியஞ்சிச் சாவார்
இவரஞ்சாத பொருளில்லை அவனியிலே !
வஞ்சகப் பேய்களென்பார்
இந்த மரத்திலென்பார்
அந்தக் குளத்திலென்பார்
துஞ்சுது முகட்டிலென்பார்
மிகத் துயர்படுவார்
எண்ணிப் பயப்படுவார் !

இது என் பாரதி நூறாண்டுகளுக்கு முன்னரே
தன் மக்களைப் பற்றிப் பாடிய பாடல்,
வெட்கக்கேடு, நாம் இன்னமும் இதுபோல
பல புரளிகதைகளுக்கு பயந்து, அடிமைப்
பட்டுக்கிடக்கிறோம் ! 

பெரியார் பகுத்தறிவை புகுத்தியதில்
கடவுள் மறுப்பை மட்டும் வலியுறுத்தவில்லை
இதுபோன்ற மூட நம்பிக்கைகளையும்
அறுத்தெறியச் சொன்னார், கடவுள்பக்தி
கூடக்கூட இதுபோன்ற பேய்ப் பயங்களும்
புகுத்தத்தான் படும் !  'கடவுள் இருக்காருன்னு
நம்புறல்ல அப்போ பேயும் இருக்கத்தான்
செய்யும்' என்பார்கள் அறிவிலி மந்திர
வியாபாரிகள் !  இந்த எழவை ஒழிக்கத்தான்
ராமசாமி 'கடவுளே கிடையாதுடா வெங்காயங்களா' என்றார் !


ரத்தம் உறிஞ்சுவதில், ஆட்டம் போடுவதில்,
அட்டூழியம் பண்ணுவதில், காவு வாங்குவதில்
மனிதனை விட எதுவுமே இந்தப் புவியில்
பயம்காட்டும் விலங்கில்லை !  ஒருவாரம்
மட்டும் மானுடப் பதரிடம் பேய்களை வாழச்
சொல்லுங்கள், பிறகு அவைகள் அதுகள்
வீட்டில் எழுதிவைக்கும் 'மனிதா, இன்னிக்கில்ல என்னிக்குமே வராதே' ன்னு !

எனக்கு தெரிந்து ரத்தக் காட்டேரிகள் மூன்று,
அவை :-
1 . என் கட்டில் மூட்டைபூச்சி
2 . எங்கள் கூவம் கொசு
3 . என் பொண்டாட்டி 
(ஹிஹி......ச்சும்மா செல்லமாச் சொன்னேன்,
என் புஜ்ஜுக் காட்டேரிய்யா அவ)



                                       THE  END